يا طير يا عالي فى السما طظ فيك (من رباعيات جاهين)(2)

من طرف the precious الجمعة يناير 16, 2009 7:31 pm

نكمل بقى اجزاء من رباعيات صلاح جاهين الجامده اوى
معلش انا بنزل الجامد فيها و على اجزاء عشان لو نزلت كله مره واحده ممكن تلاقوه كتير اوى وتملوا

11
يا طير يا عالي في الســــــما طظ فيك

ما تفتكرشي ربنا مصطــــــــــــــــفيك

برضـــــــــــك بتاكل دود و للطين تعًًًًودً

تمـــــــــص فيه يا حلو .. و يمص فيك

عجبي !!!

12
نسمة ربيع لكن بتكوي الوشـــــــوش

طيور جميلة بس من غير عشـــوش

قلوب بتخفق إنما وحـــــــــــــــــدها

هي الحياه كده .. كلها في الفاشوش

عجبي !!!!

13
وقفت بين شطين علي قنطــــــــــــــــــرة

الكدب فين و الصدق فيـــــــــــن يا تري

محتار ح اموت .. الحوت خرج لي وقالي

هو الكلام يتقــــــــــــاس بالمســـــــــــطرة

عجبي !!!

14
الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

15
- يا نجم .. نورك ليه كده بيرتجف ؟

هو انت قنديل زيت ؟ أو تختلف

- أنا نجم عالي .. بس عالي قوي

و كل ما انظر تحت اخاف انحدف

عجبي !!!!

16
السم لو كان في الدوا منين يضر ؟

و الموت لو عدونا .. منين يسر؟

حط القلم في الحبر و اكتب كمان

.. و العبد للشهوات .. منين هو حر؟

عجبي !!!

17
ما حد في الدنيا واخد جزاتــــــــــــــــــه

و لا حــــــــــــــــد بيفكر في غير لذاذاته

ما تعرفيش يا حبيبتي .. أنا و انتي مين؟

إنتي عروس النيل ... و أنا النيل بذاته

عجبي !!

18

إخطفني ياللي تحبني ع الحصان

الدنيا قالت يوم في ماضي الزمان

إخطفني ياللي تحبني ع الـــــفرس

الدنيا قالت .. قام خطفها الشيطان

عجبي !!!!

19
أنا كنت شئ و صبحت شئ ثم شــئ

شوف ربنا .. قادرعلي كل شـــــــئ

هز الشجر شواشيه ووشوشني قال :

لابد ما يموت شئ عشان يحيا شئ

عجبي !!

20
يا مشرط الجراح أمانة علـــــــــــيك

و انت ف حشايا تبص من حواليــك

فيه نقطة سوده في قلبي بدأت تبان

شيلها كمان .. و الفضل يرجع إليك

عجبي !!!