يا عندليب ما تخافش من غنوتك (رباعيات جاهين)4

من طرف the precious الثلاثاء يناير 20, 2009 11:00 pm

نكمل باقى الرباعيات بتاعة صلاح جاهين اللى بنقطكوا بيها كل شوي دي

انا على فكره زى ماقولتلكوا انا بجيب الافضل فيها بس....مش بجيبها كلها..بنقي يعني..لان بصراحه فيها حاجات مينفعش تتكتب

36

يا عندليب ما تخافش من غنوتك

قول شكوتك و احكي علي بلوتك

الغنوه مش ح تموتك إنمــــــــــا

كتم الغنا هو اللي ح يموتــــــــك

عجبي !!!

37
إيه اللي خدته من مرور السنــــــين

يا قلبي الا دمعتك و النيــــــــــــــين

بتئن و ترجع و بتفرح و ترجع تحــن

مع إن مش كل البشـــــــــــر فرحانين

عجبي !!!!

38
ازاي شبابنا يقوم و ياخـــــــــد دوره

من غير صراخ يئذيه و يجرح زوره

يا هلتري أحسن له يقعد ساكـــــــــت

أو ينترك و لو خرج عن طــــــوره ؟

عجبي !!!

39
و لو اتضنيت و فنيت وعمري انفرط

مش عاوز الجأ للحلول الوســـــــــط

و كمان شطط و جنون مانيش عــاوز

يا مين يقول لي الصح فين والغلــــط

عجبي !!

40
عيني رأت عصفور ووياه ابـــــــــنه

بيحدفه في الريح و ياخده ف حضنه

نوبتين و تالت نوبه – عجبي عليهم –

كانوا سوا بيرفرفرا و يغنـــــــــوا

عجبي !!!!

41
احسن ما فيها العشق و المعشقــــــة

و شويتين الضحك والتريقـــــــــــــة

شفت الحياة . لفيت . لقيت الألــــــــذ

تغييرها . و ده يعني التعب و الشقا

عجبي !!!

42
ياللي بتبحث عن إله تعــــــــــــبده

بحث الغريق عن أي شئ ينجـــده

الله جميل و عليم و رحمن رحــيم

أجمل صفاته .. وانت راح توجده

عجبي !!!

43
لا تجبر الانسان و لا تخـــــــــيره

يكفيه ما فيه من عقل بيحيــــــره

اللي النهارده بيطلبه و يشتهــــيه

هو اللي بكره ح يشتهي يغيـــــره

عجبي !!

44
عجبي علي العجب العجيب العجاب

لما الحقيقة تطل بعد احتجاب

و تروح و تحلا وفجأة تصبح مفيش

كمثل طراطيش بحر ياما خد و جاب

عجبي !!!

45

وقفت ساعة الصبح باغسل سناني

قالت لي شايف قوتي و لمعاني ؟

إيش تطلب اليوم مني ضحكة أسد ؟

والا ابتسامة اعلانات أمريكاني ؟

عجبي !!

46
اوقات أفوق و يحل عني غبــــــــــايا

واشعر كأني فهمت كل الخبايـــــــــــا

و افتح شفايفي علشــــــان اقول الدرر

ما أقولش غير حبة غزل في الصبايــــا

عجبي !!!

47

ولدي إليك بدل البالون ميت بالــــــون

انفخ وطرقع فيه علي كل لـــــــــــون

عساك تشوف بعينك مصيرالرجــــــال

المنفوخين في السترة و البنطلـــــون

عجبي !!!

48
عيني رأت مولود علي كتف أمـــــــــــه

يصرخ تهنن فيه يصرخ تضــــــــــــمه

يصرخ تقول يا بني ما تنطق كـــــــلام

ده اللي ما يتكلمش يكتر همـــــــــــــه

عجبي !!!!

49
حاسب من الاحزان و حاســـــــب لها

حاسب علي رقابيك من حبلـــــــــــها

راح تنتهي و لابد راح تنتهــــــــــي

مش انتهت أحزان من قبلهــــــــــا؟

عجبي !!!

50
ولدي نصحتك لما صوتي اتنبــــــــــــح

ما تخفش من جني و لا من شبـــــــــح

و ان هب فيك عفريت قتيل إسألـــــــــه

ما دافعش ليه عن نفسه يوم ما اندبح

عجبي !!