لمن يرغب فى فتح معمل تحاليل

من طرف نهر الحب الجمعة أغسطس 29, 2008 4:11 pm

هذا الموضوع للامانة منقول
بس انا حبيت اجيبوه لان اكيد فيه ناس كتيرة محتاجة تعرف المعلومات دى

لازم أقول حاجة مهمة جدا جدا وأسأل سؤال مهم :

س / هل من حقي أن أفتح معمل ؟ وأكتب عليه اسمي ؟ وابقى دكتور تحاليل؟

هذا يقودنا إلى سؤال سؤال هام جدا : يعني قانونا هل المعمل ده من حقي ؟

* القانون المصري لسنة 54 لم يفرق في ممارسة مهنة التحاليل الطبية بين الكيميائي والصيدلي والطبيب .. إلخ بل هذا الحق يتساوى فيه جميع الخريجيين طالما قد استوفوا شهادات التخصص المطلوبة، واعتبره القانون المصري حق مكتسب ومشروع للجميع واعتبر مهنة التحاليل الطبية مهنة منفصلة عن باقي التخصصات الطبية الأخرى.

* هذا القانون معمول به في كثير من الدول العربية مثل تونس – سوريا وجميع دول العالم الأول مثل : أمريكا – كندا – فرنسا – ألمانيا – بريطانيا .. إلخ

* إن أقدر وأكفأ من يتعامل مع أجهزة التحليل الكيميائي كالأسبكتروفوتوميتر أو الفصل الكروموتوجرافي أو التحضير الكيميائي للعينات الكيميائية أو الإلمام بالتقنيات الكيميائية في التحليل الكيميائي أو العضوي مثل التحليل التربيديمتري أو الكلاريمتري أو الجرافيميتري هم الكيميائيون والبيطريون والصيادلة بحكم طبيعة الدراسة .

* المسألة تتلخص في تحليل عينة فقط فالجميع من أطباء أوغيرهم - رسميا - غير مطالبين : لا بتشخيص سريري – ولا بربط النتائج – ولا بكتابة علاج - أو تفسير نتيجة !!!

حتى سحب بعض العينات قد يخرج عن نطاق تخصصك!! مثل عينات الدم للمولودين حديثا (تعرض على أخصائي الأطفال) – عينات فحص الأورام ( أخصائي الباثولوجي) – عينات البذل النخاعي (التخدير أو الحميات)

* للأسف يروج بعض الأطباء في أحقيتهم وإلغاء أحقية الباقيين في ممارسة المهنة ويضعون العراقيل ويحاربون بشتى السبل من أجل ضع قصور على الباقيين في ممارسة المهنة، ويضغطون على وزير الصحة من أجل رفض إعطاء الترخيص والتحايل على القانون (الصريح)، ولي عنق الحقائق ، واتباع مبدأ "بروكر استيز" الذي كان يقطع أرجل ضيوفه لتناسب طول السرير الذي سينامون عليه !!! ويتفنون في وضع العراقيل لمنعنا من ممارسة المهنة مثل إجبارنا على رفع القضية وخلافه ؟؟؟ وكتابة عبارات في الصحف بغرض الإثارة : " تضافروا لقصر المهنة على الأطباء" أو من يكتب : " فوضى التحاليل الطبية"

سؤال فرعي / ما هي آخر صيحة في وضع القصور للمزاولة؟

(1) التصريح يكون بالماسترية لا بالدبلوم
(2) العمل في المستشفى مدة 3 سنوات
(3) ضرورة كتابة التخصص الحقيقي : صيدلي / بيطري / كيميائي .. إلخ على لافتة المعمل و على التقرير، كما تكتب بجواره : "الكيمياء الحيوية الصيدلية" أو "الميكروبيولجيا البيطرية".. إلخ
(4) إجبارك على ممارسة التحاليل التي قد تخصصت فيها ، وهذه قصة طويييييييييييييلة جدا

لكن هذه القصور غير معمول بها الآن ولله الحمد ، بل يريدون تنفيذها !!

* لقد خسرت نقابة الأطباء القضية المرفوعة ضدنا لمزاولة المهنة وأمام مجلس الشعب قوبل طلبهم بالرفض عام 94 بعد أن أستماتوا في تقديمه ومازالوا، هنا أعيد الحق لأصحابه ، لكن هناك من يعبثون بشد ذيل القط النائم من آن لآخر

* الخلاصة .. التحاليل الطبية لا تعتمد على التشخيص السريري .. أنك - في المعمل - تتعامل مع عينة لا مع مريض ، وأنك الأكفأ والأجدر مقارنة بما هو مطلوب ، أنت تشخص فقط تشخيصا طبيا معمليا لا سريريا ولا تعتمد على الحالة الإكلينيكية في التحليل ، لكنها تؤخذ في الإعتبار ، وأكرر تؤخذ في الإعتبار.

إن ممارسة التحاليل الطبية حقك ..

حقك ..

حقك !!

* في دول العالم الأول يتساوى الصيادلة مع الكيميائيين مع الأطباء مع البيطريين في الحصول على المناصب ، ومعروف أن رئيس الإتحاد الدولي للتحاليل الطبية صيدلي ويتناوب على رئاسة المنصب بيطريين وأطباء وكيميائيين وصيادلة.كما يتولى إدارة بعض معامل البرج المصرية أوالعربية بجانب الأطباء .. صيادلة وكيميائيين أيضا.

* وجدير بالذكر - ومعلومة لمن لا يعلم - أن من أبرز مؤسسي بعض أقسام التحاليل الباثولوجيا الإكلينيكية بكليات الطب العريقة هم أساتذه صيادلة وبيطريين وكيميائيين في علوم الميكروبيولجي والبيوكمستري !!!

حاشية : أنا لا أتحامل على الأطباء .. حاشا !!! فكثير منهم الزميل والقريب والصديق والأخ والأب (والله)، وأنا مؤمن بدورهم الفعال في المجتمع تمام الإيمان ، ومتيقن من عظم وتفعيل دور الطبيب في النهوض بمستوى الطب وأنه ملقى على عاتقه يمكن أكثر من 90% من مجمل الخدمات الطبية التي تقدم للمجتمع والأبحاث والوعي الصحي .. إلخ ، وده لو كان موضوع تعبير كنت كتبت 6 ورقات فلوسكاب وش وضهر !!! وإن كنت قد جرحت مشاعر أو آذيت أي من أخوتي الأطباء فأنا على اتم أستعداد أن أقدم له اعتذاراً فقط لمجرد أن يبدي سبباً ، وحقيقي .. حينما يتعلق الأمر بحق شرعي ورسمي وقانوني فمن كل المشروعية أن أدفع عنه وأطالب به ... ارجو من الجميع مشاركتي الرأي وإبداء ملاحظتهم بالتواصل الإلكتروني معي ..

ركزوا معايا يا جماعة ..

عشان أنت ككيميائى تفتح معمل بإسمك لازم تعمل الخطوات الآتية:

(1) أن تحصل على أحد أو جميع شهادات الدبلوم في الآتي :

+ دبلوم الميكروبيولجي العامة أو التطبيقية أو الإكلينيكية أو الماسترية (ماجستير) في نفس التخصص برضه أو على :

+ دبلوم البكتيريولوجيا العامة أو الإكلينيكية أو على:

+ دبلوم الكيمياء الحيوية التحليلية أو الإكلينيكية أو الماسترية فيها

(2) ح تاخد من النقابة درجة : أخصائي تحاليل طبية

ثم تأخذ التصريح من وزارة الصحة ويستغرق أشهر حسب دورك و العدد .. إلخ بس ح يكتبولك في التصريح عبار ": مع عدم التشخيص الطبي المعملي" يعني المعمل ح تبقى أنت مديره لكن مش صاحبه ؟؟؟ هههههههه

، ولن يسمح لك بوضع لافتة عليه ؟؟؟؟ ههههههههه

ولن يسمح لك بكتابة اسمك على التقرير ؟؟؟؟ هههههههه

ولن يسمح لك بأن تمضي على نتائج التحليل ؟؟؟؟ ههههههههه

إذن فبهذا التصريح ح تبقى كوكتيل ومزيج فريد من دكتور التحاليل وفني المعمل !!

(3) ح ترفع قضية وتقعد حوالي سنة ب 1000 ألف جنية بس عند محامي مشهور . وللعلم انها اصبحت الان ب2000جنيه

وح تكسبها .. ح تكسبها .. ومضمونة 100% (لأن ده حقك كخريج علوم يعنى كيميائى) .. المهم بعد لما تكسبها ح تبقى دكتور تحاليل فعلا ..

وهنايسقط الفرق (عمليا) بينك وبين الطبيب الأخصائي !!

++ ملاحظة لا معنى لها ولابد منها !! : الفرق الرسمي (واخد بالك من الرسمي دي؟) بينك وبين الطبيب أنك لو خدت الدبلومتين الميكرو + البيو ح يبقى في سحب العينات فقط .. يعني لازم ح تجيب ورقة من دكتور طبيب أنه المسئول عن السحب في المعمل بتاعك ، وأنت اللي ح تسحب العينات برضه.. يعني عمليا مفيش فرق !!! وإحقاقا للحق .. ان هذا هو الفرق الرسمي الوحيد بين الطبيب وغيره في ممارسة المهنة

+ أسئلة ع السريع باختصار (مجاب عنها ) :

س 1 : إيه لزوم القضية طالما إن الموضوع من حقي وكده كده ح أكسبها ؟؟؟؟؟؟؟؟؟؟؟؟

ج 1 / إحنا في مصر !

س 2 : لأ بجد .. عاوز أعرف إيه لزومها؟

ج 2 / عشان يخوفك ويوهمك إن دي حاجة مش بتاعتك فتقوم جاي مطنش وتقول لنفسك في سذاجة: طالما أنه مش مسموح لي تبقى مش بتاعتي؟؟؟؟؟ في حين أنه حقك ودي لعبة "الحق يغتصب" .. نقطة تانية هي نوع من أنواع كوابح السيارات والفرامل عشان متكترش المعامل زي الأجزاخانات ! ويبقى بين كل معمل ومعمل مختبر !!

س3: إيه أفضل وأسرع شهادة لفتح المعمل (يعني م الآخر .. عاوز أنجز )؟؟؟؟؟

ج 3 / دبلوم ميكروبيولجي أو بيوكمستري وأنا بفضل الأخير ومدته سنه بس لكني أنصحك بال 2 .

س 4 : الليلة دي ح تكلف كام؟

ج 4 / الدبلوما تمنها تبع المكان (متوسط كله 2000 + 1000 القضية)

س 5 : طيب أخدها من أي جامعة أو من أي كلية ؟

س 5 : صراحة .. اشهر ناس شغالين في الحكاية دي كليات العلوم ..

عندك في صيدلة : المنصورة - الزقازيق - الإسماعيلية - عين شمس (بيخرجوا أعداد قليلة
عندك في علوم : اسكندرية (أشهر دبلومة تحاليل في الجمهورية وبتخرج كل سنة 700 أخصائي) - شبين الكوم ( بدأت تشتهر برضه بتخرج حوالي 700 ) - الإسماعيلية ( بتخرج حوالي 1000 أخصائي
عندك بيطري : مشتهر / اللي جنب بنها ( تنافس الأسكندرية وبتخرج حوالي 1000 أخصائي على ما اسمع ) - المنصورة (مبتعديش ال 50 في أي كلية) بس (علوم بكتيريا ممكن تعدي ال 80)

س 6 : طيب إيه أرخصهم وأسهلهم؟ ويديلي الشهادة ع السربع ؟؟

ج 6 / * احذر هؤلاء : المنصورة (معقدين أوي ) - عين شمس (ناشفة؟)
* تحاشى هؤلاء : مشتهر لاناللي بيدخل ما بيطلعش إلا فيما ندر - شبين (مهرها غالي 2500 ) - طنطا( !بيقولوا صعبة ومش عاطفية
* ارشح لك دول : الزقازيق و الإسماعيلية (باشا !!) - اسكندرية (شغالة) – شبين (كويسة / بس غالية) - بنها ( وأنت واقف!!!)

س 7 : طيب لو أنا (بالي طويل) وعاوز أبقى كفاءة في التحاليل وافتح جنب معمل البرج؟ !!!!

ج 7 / دبلوم ميكرو + ماستر أو دكتوراه في البيو ( أو العكس لكني أفضل كده)

س 8 : طب و الليلة دي ح تستهلكني في كام سنة؟؟؟؟
ج 8 / لو أنت بيدعولك في البيت كويس ح تقعد من 8 -9 سنين

س 9 Sad

للمحترفين فقط) : طيب لو أنا عاوز آخد جايزة نوبل في التحاليل أو كأس العالم ؟!!!!!!!!
ج 9 / دبلوم ميكرو + دبلوم بيو + دكتوراه في المناعة
ملاحظة : اعرف دكتور معاه كل دول .. واعرف دكتور تاني معاه دكتوراه الفلسفة في الميكرو + دكتوراه البيوكمستري وكاتب على المعمل :" معمل الدكاتره فلان الفلاني " وع التقرير كاتب :" الدكتور الدكتور" - فعلا بتاعة شهادات !!

س 10: ممكن أعرف إيه حكاية المناعة دي بقى؟؟

ج 10 / معهد البحوث الطبية / اسكندرية بيدي ماسترية للكيميائين في المناعة لكن بيطلب تقدير وبياخد بالعدد (بيطلبوا 2 من صيدلة بس ) يعني الموضوع ممكن يفرقع منك – وبيطلب برضه 2 أطباء – و6 كيميائيين .. تحيز؟

أو عندك معهد بحوث الهندسة الورائية / السادات وده بياخد كله .. ورخيييييص 400 في السنة ومفيش تمهيدي ماجستير .. يعني رسالة على طول + كورسات / سنتين وده بيدي دبلوم أو ماسترية أو دكتوراه أو دكتوراه الفلسفة في المناعة الجزيئية

س 11 / مين تاني ممكن يفتح معمل ؟
الزراعيين – الكيميائيين – الصيادلة - البيطريين – الأطباء
وجميعهم لابد لممارسة المهنة من الحصول على دبلوم أو الماسترية أو الدكتوراه في التحاليل
وجميعهم يأخذ درجة : " أخصائي تحليل طبية"

اتمنى ان يكون هذا الموضوع قد افاد البعض منكم

من طرف the precious الجمعة أغسطس 29, 2008 5:36 pm

شكرا عالافاده بس انا سمعت ان حوار القضيه دا اتلغى....بس بصراحه مش متأكد اوي

من طرف همسه الجمعة أغسطس 29, 2008 6:44 pm

شكرا على الافاده

بس احنا محتاجين الدبلومه بس
وبعد كده اقدر افتح المعمل من غير ماستنى او ارفع قضيه وشوفت ناس كتير كده

وعاملين كروت والمعمل مكتوب بإسمهم

بس مكتوب اخصائى تحاليل الدم ومش فاكره الباقى

من طرف islam الجمعة أغسطس 29, 2008 11:25 pm

الموضوع حلو اوى وانا بفكر اخد ليسانس حقوق عشان ادافع عن المظلومين اللى وخدين حقهم فى كل بلاد العالم معدا الغاليه مصر اللى هى امى

من طرف islam الجمعة أغسطس 29, 2008 11:27 pm

نفسى اعرف الاسم الحقيقى لنهر الحب

من طرف dina samir السبت أغسطس 30, 2008 7:39 pm

شكرا يا نهر الحب على الكلام الجميل دة
وعلى فكرة انا كمان سمعت عن موضوع القضية وانها ماتلغتش Very Happy

بس انا عاوزة اعرف انتى مين

من طرف ahmed maddish الأربعاء سبتمبر 03, 2008 4:27 pm

شكر على الافادة ................

بالتوفيق دائما

من طرف robaraf الأحد سبتمبر 14, 2008 10:28 pm

شكرا يا قمر بس اللى انا اعرفه اننا محتاجين الدبلومه بس وموضوع القضيه شغال برضه

من طرف dina saied الإثنين سبتمبر 15, 2008 12:40 am

شكرا يا نهر بس انا اتعقدت واتخنقت اوىىىىىىىىى

من طرف dina samir الإثنين سبتمبر 15, 2008 12:48 am

ومين سمعك ياسعدودى بس هى دى الدنيا محدش بياخد كل حاجة بس لازم نعمل اللى علينا وربنا يكرمنا ان شاء الله

من طرف rafprof الثلاثاء سبتمبر 16, 2008 3:23 am

انا كنت ناوى افتح معمل مستقبلا بعد اللى سمعته ده هفكر مليون مرة وشكرا على الافادة اينعم اتعقدت بس مش مشكلة بس لو المشكلة فى القضية محلولة عندى اوى اوى

من طرف نهر الحب الثلاثاء سبتمبر 16, 2008 3:40 am

ياجماعة انا مكانشى قصدى اعقدكم والله

انا زيا زيكم اتفاجئت جدا لما عرفت المعلومات دى

وحبيت انقلهالكم علشان تعرفوها

وعلى الرغم من كل الى انا عرفته ده

بس برده مكملة حاليا فى تحضير ورقى علشان الدبلومة

وان شاء الله ناوية اعملها

وبعد كده ربنا يقدم الى فيه الخير

وبدعيلكم كلكم بالتوفيق ان شاء الله وربنا يكرمنا جميعا فى حياتنا

باذن الله